विद्यालयमा शुक्रबार भएको तीज गीत प्रतियोगितामा दुई फरक समूहका विद्यार्थीहरूले प्रतिस्पर्धा गरेका थिए । कक्षा ४ देखि ६ सम्ममा समिक्षा बोहोराको समूह प्रथम, अनामिकाको समूह द्वितीय र रञ्जनाको समूह तृतीय भए ।
कक्षा ७ देखि १२ सम्ममा सुदिश्ना न्यौपानेको समूहले प्रथम स्थान हासिल ग¥यो भने सोनिया खड्काको समूह द्वितीय र प्रकृति शर्माको समूह तृतीय भए । विजयी विद्यार्थीहरूलाई पुरस्कार प्रदान गरी सम्मान गरिएको थियो ।
विद्यालयको शैक्षिक गुणस्तर अभिवृद्धिमा महत्त्वपूर्ण भूमिका खेलेका शिक्षकहरूलाई पनि सोही कार्यक्रममा सम्मान गरिएको छ । एस.ई.ई. २०८१ मा शतप्रतिशत नतिजा ल्याउन सफल भएकोमा विद्यालयले शिक्षकहरूलाई नगद र सम्मानपत्रले सम्मान गरेको हो। यस वर्षको एस.ई.ई. परीक्षामा सहभागी १ सय ४१ विद्यार्थीमध्ये ९३ प्रतिशत अर्थात् १ सय ३१ विद्यार्थी उत्कृष्ट अंकसहित उत्तीर्ण भएका थिए। जसमध्ये, ८ जना विद्यार्थीले ए प्लस ल्याएका थिए ।
कार्यक्रमका प्रमुख अतिथि तथा सैनामैना नगरपालिकाका प्रमुख फणीन्द्र प्रसाद शर्माले पर्रोहा माध्यमिक विद्यालयको प्रशंसा गर्दै यस विद्यालयबाट उत्पादित विद्यार्थीहरूले विभिन्न क्षेत्रमा ख्याति कमाएको बताए । उनले अहिलेको तीजमा परम्परागत मौलिकता हराउँदै गएकोमा चिन्ता व्यक्त गरे ।
’पहिला–पहिला तीजलाई महिला दिदीबहिनीहरूले दुःख–पीडा साट्ने र माइतीमा रमाउने पर्वका रूपमा मनाउँथे,’ उनले भने, ’तर अहिले होटल र रेस्टुरेन्टमा मनाउने चलन बढेको छ ।’ उनले हुनेखाने र हुँदा खाने सबैले एकै किसिमले चाड मनाउनुपर्नेमा जोड दिँदै घरमा जे छ, त्यसैमा रमाएर परम्परागत र स्वस्थवर्धक खानेकुरा खाँदै पर्व मनाउन आग्रह गरे ।
विद्यालयका अध्यक्ष रामप्रसाद अधिकारीको अध्यक्षतामा सम्पन्न उक्त कार्यक्रममा प्रधानाध्यापक बल बहादुर के.सी., सह–प्रधानाध्यापक हरिप्रसाद भट्टराई, विद्यालय व्यवस्थापन समितिका पदाधिकारीहरू तथा शिक्षक र विद्यार्थीहरूको उपस्थिति रहेको थियो । कार्यक्रम शिक्षक भावना पौडेल ज्ञवालीको सञ्चालन सम्पन्न भएको थियो ।
